நான் நுகர்ந்த  சொற்பூக்கள்


வாழ்தலும் இருத்தலும்


நூறில்
தொண்ணூறு விளம்பரங்கள்
சுத்தம்பற்றியதானவை
குழந்தையின் பின்புறம் முதல்
கழிவறை பீங்கானின் உட்புறம் வரை.
நுண்ணோக்கி வழியே
நெளியும் கிருமிகள்.
தெரு மண் புழுதியில் வெற்றுடம்போடு
உருண்டு புரண்டு கிழிந்து
கிழிசலுக்கு ஊசியாய்
மண்ணையே பூசி விளையாடிய
ஆதி வீதிச் சிறார்
மருத்துவமனை முகவரியும் அறியார்.
நொடிக்கொரு தரம் ஹேண்ட் வாஷில்
கை கழுவும் கான்க்ரீட் மைந்தர்கள்
மூன்று வயதிலேயே
மூக்குக் கண்ணாடியோடு.
அதிர்ந்தடங்கி அயர்ந்து
அலைவரிசை மாற்றினால்
அங்கும் போய்க்கொண்டிருக்கிறது
செயற்கைக் கருவூட்டல்
மருத்துவமனை விளம்பரம்!

- பிரகாசிகை