சிவில் சர்வீஸ் தேர்வுங்கிறது நிறைய பேருக்கு சிறுவயதுக் கனவா இருக்கும். எனக்கு காலேஜ் இறுதியாண்டு படிக்கும்போதுதான் அந்த எண்ணமே வந்துச்சு. மொத்தமே ரெண்டு வருஷம்தான் அதுக்குப் பயிற்சியெடுத்தேன். ஆனா, ரொம்பவே சின்சியரா படிச்சேன். அந்த முயற்சிக்குத்தான் இப்போ பலன் கிடைச்சிருக்கு” - உற்சாகமும் மகிழ்ச்சியும் ததும்புகின்றன ஜீஜீயின் வார்த்தைகளில். யு.பி.எஸ்.சி தேர்வில், முதல் முயற்சியிலேயே இந்திய அளவில்107-வது இடத்தையும் தமிழ்நாடு அளவில் முதலிடத்தையும் பிடித்து சாதித்திருக்கிறார் சென்னை, கொளத்தூரைச் சேர்ந்த ஜீஜீ. இன்னொரு பெருமிதமான செய்தி, ஜீஜீ ‘சுட்டி ஸ்டார்’ ஆகத் தேர்வாகி சுட்டி விகடன் இதழில் பல கட்டுரைகளை எழுதியவர். ஜீஜீக்கு வாழ்த்துகள் சொல்லி உரையாடினேன்.

ஜீஜீ

“நிச்சயம் பாஸ் பண்ணுவேன்னு தெரியும். ஆனா, தமிழ்நாடு அளவுல முதலிடத்தைப் பிடிச்சது எனக்கே ஆச்சர்யம்தான். ரொம்ப சந்தோஷமா இருக்கு. இந்த வெற்றிக்குக் காரணம் என் பெற்றோர் கொடுத்த ஊக்கம்தான். அப்பா சுரேஷ் எலெக்ட்ரீஷியன். மிடில் கிளாஸ் குடும்பம்தான். எனக்கு என்ன படிக்க விருப்பமோ அதை சுதந்திரமா படிக்கவச்சார். என் அண்ணன் மனோஜ்தான் எனக்குப் பெரிய இன்ஸ்பிரேஷன். ஒரு தொண்டு நிறுவனத்தில் சோஷியல் ஒர்க்கரா இருக்கார். ‘பணம், பொருள், செல்வாக்கு மட்டுமே உலகமில்லை. நிறைய மனிதர்கள் வறுமையாலும் உரிமைகள் கிடைக்காமலும் கஷ்டப்படுறாங்க. அவங்களுக்கு நம்மால முடிஞ்ச உதவிகளைச் செய்யணும்’னு அடிக்கடி சொல்வார். அவரோட தன்னம்பிக்கை வார்த்தைகள்தான் ஐ.ஏ.எஸ் தேர்வு எழுதணும்ங்குற உந்துதலையே கொடுத்தது” என்றவரிடம் “உங்க முழுப்பேரு என்ன ஜீஜீ?” என்றேன்.

“பலரும் என்கிட்ட இதைத்தான் கேட்பாங்க. என் முழுப் பேரே ஜீஜீதான். நடிகர் ஜெமினி கணேசனின் மகள் ஜீஜீயைப்போல நான் பெரிய டாக்டராகணும்னு எங்கப்பா இப்படியொரு பேரை வெச்சாராம். ஆனா நான் பத்தாம் வகுப்பு படிக்கும்போதே ‘ எனக்கு சயின்ஸ்ல இன்ட்ரஸ்ட் இல்லைப்பா, காமர்ஸ்தான் படிக்கப்போறேன்’னு சொல்லிட்டேன். அதன்படியே என்னைச் சேர்த்துவிட்டாங்க. பத்தாம் வகுப்புல 491 மார்க் எடுத்துப் பள்ளியில மூன்றாவது இடம் வந்தேன். பிளஸ் 2-ல 1,190 மார்க். ஸ்கூல் பர்ஸ்ட். காலேஜிலும் இரண்டாவது இடம். இதுக்கெல்லாம் காரணம், நான் என்ன படிக்கணும்னு ஆசைப்பட்டேனோ அதன்படி என்னைப் படிக்க வெச்சதுதான்.

2021-ல காலேஜ் முடிச்சதுமே சிவில் சர்வீஸ் பத்தின தகவல்களைத் தேடத் தொங்கிட்டேன். அறம் ஐ.ஏ.எஸ் அகாடமியிலதான் படிச்சேன். அங்கே கிடைச்ச உந்துதலும் வழிகாட்டுதலும் ரொம்ப உதவியா இருந்துச்சு...” என்றவரிடம் ‘‘முதல் முயற்சியிலேயே தேர்ச்சி பெறுவது சாதாரணமல்ல... எப்படி சாத்தியமாச்சு?’’ என்றேன்.

‘‘என்னோட முதல் பயிற்சியே செய்தித்தாள் வாசிக்கிறதுதான். அப்பாவைப் பாத்துதான் அதையும் கத்துக்கிட்டேன். எங்க ஏரியா நூலகத்தில் மெம்பர் ஆகி நிறைய புத்தகங்கள் படிச்சேன். ‘சுட்டி விகடன்’ல சுட்டி ஸ்டாராகத் தேர்வாகி கட்டுரைகள், கவிதைகள்னு ஒரு வருடம் எழுதி, என்னோட படைப்புகள் வெளிவந்தது. அதுக்காகவும் நிறைய வாசிச்சேன். உண்மையைச் சொல்லனும்னா இந்த வெற்றியில விகடனுக்கு முக்கியப் பங்குண்டு. சின்ன வயசிலிருந்தே வந்த வாசிப்புப் பழக்கம்தான் முதல் முயற்சியிலேயே வெற்றிபெற உதவுச்சு. அதோட, ரெண்டு முக்கியமான விஷயங்கள் இருக்கு. சிவில் சர்வீஸ் தேர்வில் ஜெயிக்கணுனா, எந்தத் தொந்தரவும் இல்லாம முழுசா அர்ப்பணிச்சுக்கிட்டுப் படிக்கணும். சரியான வழிகாட்டுதல் இருக்கணும். இது ரெண்டும் எனக்கு கரெக்டா அமைஞ்சது...” என்கிறவர், விருப்பப் பாடமாக தமிழ் இலக்கியத்தைத் தேர்ந்தெடுத்தது குறித்துக் கேட்டேன்.

பெற்றோருடன் ஜீஜீ

‘‘திருக்குறள் எனக்கு ரொம்பப் பிடிக்கும். திருக்குறள் ஒப்புவித்தல் போட்டியில நிறைய பரிசுகள் வாங்கியிருக்கேன். அந்த ஆர்வம்தான் விருப்பப் பாடமா தமிழ் இலக்கியத்தைத் தேர்ந்தெடுக்க வெச்சது...” என்கிறார் ஜீஜீ.

‘‘முதல்நிலைத் தேர்வில் அறிவும் தன்னம்பிக்கையும் முக்கியம். அடுத்தது, நமது பாடத்திட்டம் என்னங்கிறதைச் சரியா புரிஞ்சுக்கிட்டு அது தொடர்பான புத்தகங்களைத் தேடிப்பிடிச்சுப் படிக்கணும். முதல்நிலைத் தேர்வை 5 லட்சம் பேர் எழுதுறாங்கன்னா 13,000 பேர்தான் அடுத்த கட்டத்துக்குத் தேர்வாகுறாங்க. அதிகம்பேர் தோல்வியடைறது முதல்நிலைத் தேர்வில்தான். அதனால அதுல கூடுதல் கவனம் செலுத்தணும். முக்கியமா, முதல்நிலைத் தேர்வு எழுதுறதுக்கு முன்னாடி குறைஞ்சது 60 மாதிரித் தேர்வுகளாவது எழுதியிருக்கணும். ஏற்கெனவே கேட்கப்பட்ட வினாத்தாள்களை மாதிரியாக வைத்துத் தேர்வு எழுதலாம். என்னென்ன பாடங்களில் எப்படியெல்லாம் கேள்வி கேட்டிருக்காங்கன்னு அனலைஸ் பண்ணிப் பார்க்கணும். அப்படிச் செஞ்சா முதல்நிலைத் தேர்வை கிளியர் பண்ணிடலாம்.

முதன்மைத் தேர்வைப் பொறுத்தவரை சரியான கன்டென்ட் நம்ம கைல இருக்கணும். அதோட, விடைத்தாள்களை பிரசன்ட் பண்ணுற விதமும் முக்கியம். நம்ம விடைத்தாள்களைத் திருத்துறவங்களுக்கு ஒரு நம்பிக்கையை உருவாக்கணும். கையெழுத்து ரொம்ப ரொம்ப முக்கியம். எழுதி எழுதிப் பயிற்சி எடுத்தால் முதன்மைத்தேர்வு சக்சஸ் ஆகும்.

நேர்முகத்தேர்வைப் பொறுத்தவரை, நாம் யார்ங்கிறதெல்லாம் அதிகாரிகளுக்குத் தெரியாது. நம்மைப்பற்றித் தெரிந்துகொள்வதற்கான தேர்வுதான் அது. அதுக்கு நிறைய பயிற்சி எடுக்கணும். நம்மள நாம முழுசாப் புரிஞ்சு வச்சுக்கணும். பள்ளியில் ஆரம்பிச்சு கல்லூரிவரைக்கும் என்ன படிச்சோம்... எப்படிப் படிச்சோம்... ஏன் அந்தப் பாடப்பிரிவுகளைத் தேர்ந்தெடுத்துப் படிச்சோம்ங்கிறதை எல்லாம் நினைவுப்படுத்தித் தெளிவா ஞாபகம் வச்சுக்கணும். நான் நேர்முகத்தேர்வுக்குப் போனபோது 5 பேர் இருந்தாங்க. முதல் கேள்வியே என்னோட பேருக்கான அர்த்தம் கேட்டாங்க. நான், காரணத்தைச் சொன்னேன். ‘தமிழ்நாட்டுல சினிமாவோட தாக்கம் எந்த அளவுக்கு இருக்கு’ன்னு கேட்டாங்க. கதை, கவிதை எழுதுறதுல எனக்கு இன்ட்ரஸ்ட்ங்குறதால, ‘நீங்க எழுதுறதால மக்களுக்கு என்ன பயன்’னு கேட்டாங்க. ஒருத்தர், 'தமிழ்நாட்டுல நீங்க ஒரு மாற்றத்தைக் கொண்டுவர நினைச்சா, எதைக் கொண்டுவருவீங்க'ன்னு கேட்டார். அதுக்கு நான் கொடுத்த பதில் ‘பெண் சுதந்திரம்.’ ‘பெண் சுதந்திரத்தை யாரோ கொடுக்கணும்னு எதிர்பார்த்துக்கிட்டு இருக்கக்கூடாது. அது நமக்கான உரிமைன்னு பெண்களே உணரணும். அதை உணர்த்துறமாதிரி பெண்களுக்காக நிறைய திட்டங்களைக் கொண்டுவருவேன்'னு சொன்னேன்.

அன்னைக்கு வெளியான செய்திகளின் அடிப்படையிலேயும், நான் படித்த வணிகவியல் தொடர்பாவும் 25 கேள்விகளுக்கு மேல கேட்டாங்க. எல்லாத்துக்கும் பதில் கொடுத்தேன். எந்த ரியாக்‌ஷனும் இல்லாம கேட்டுக்கிட்டாங்க. சிவில் சர்வீஸ் தேர்வுக்கு மொத்த மதிப்பெண் 500. என்னோட மதிப்பெண் 271. நேர்முகத்தேர்வுக்கு மொத்தம் 275 மதிப்பெண். நான் 193 எடுத்தேன். இது குறிப்பிடும்படியான மதிப்பெண்தான்’’ என்கிற ஜீஜீ இப்போது ஐ.எஃப்.எஸ் எனப்படும் வெளியுறவுப் பணிக்கு முன்னுரிமை கொடுத்திருக்கிறார். “பெரும்பாலும் ஐ.ஏ.எஸ் ஆகணும்னுதான் ஆசைப்படுவாங்க. நீங்க ஏன் ஐ.எஃப்.எஸ் தேர்ந்தெடுத்தீங்க?” என்றேன்.

ஜீஜீ

‘‘சிவில் சர்வீஸுக்குப் படிக்கும்போதே மெல்ல மெல்ல அயல்நாட்டுச் செய்திகள் மீது ஆர்வம் வந்துடுச்சு. உக்ரைன்ல போர் நடந்தது. நமது இந்திய மாணவர்கள் அதில் சிக்கிக் கஷ்டப்பட்டதை நினைச்சு எல்லோருமே வருத்தப்பட்டோம். இவ்வளவு தாக்கத்தை ஏற்படுத்துற அயல்நாட்டுச் செய்திகளுக்குப் பின்னால் இருக்கக்கூடிய பணிகள் என்ன? நம் நாட்டுத் தூதர்கள் எப்படிப் பணிபுரியுறாங்க... இதையெல்லாம் பார்க்கணும்னு ஆர்வப்பட்டேன். அந்த ஆர்வத்துலதான் ஐ.எஃப்.எஸ்ஸுக்கு முன்னுரிமை கொடுத்திருக்கேன்” என்கிறவரிடம், ‘‘உங்களுக்கு சவாலான விஷயமா இருந்தது எது?’’ என்று கேட்டேன்.

‘‘மாதிரித் தேர்வுகள்ல மதிப்பெண்கள் குறைஞ்சா, எனக்கு உடனே நாம கரெக்டா தான் போறோமான்னு சந்தேகம் வந்துடும். இன்னும், கடின உழைப்பைப் போடுவேன். தினமும் 8 மணி நேரம் இந்தத் தேர்வுக்காகப் படிச்சேன். நான் எந்த சோஷியல் மீடியாவிலும் இல்லை. முதன்மைத் தேர்வுல தேர்ச்சிபெற்றபிறகுதான் வாட்ஸ்அப்பே போன்ல இன்ஸ்டால் பண்ணினேன். இணையதளங்களை ஆக்கபூர்வமா பயன்படுத்திக்கிட்டேன். படிப்பு படிப்புன்னு இருக்கிறதால மன அழுத்தம் ஏற்படும். அதனால, நடுநடுவே ரிலாக்ஸ் பண்ணிக்கணும். என்னை ரிலாக்ஸ் ஆக்கிக்க, காந்தியோட சுயசரிதை படிச்சேன். அகிம்சை வழியைத் தேர்ந்தெடுத்த காந்தி எனக்குப் பெரிய இன்ஸ்பிரேஷன். நானும் அந்த வழியைத்தான் தேர்ந்தெடுப்பேன்’’ என்கிறார் அழுத்தமாக.

எளிய குடும்பத்திலிருந்து சிவில் சர்வீஸ் தேர்வில் வெற்றி பெற்று சாதித்திருக்கிற ஜீஜீ, நம் எல்லோருக்குமான நம்பிக்கை!

 மனிதர்களின் வேலையைப் பறிக்கப் போகிறது... அபாயம்!' என்றெல்லாம் ஒரு பக்கம் குரல்கள் ஒலித்தாலும், AI எனப்படும் செயற்கை நுண்ணறிவை உலகம் இருகரம் கூப்பி வரவேற்கத்தான் செய்கிறது. விரும்பினாலும் விரும்பாவிட்டாலும் பொறியியல் துறையில் Artificial Intelligence-ன் வளர்ச்சி பிரமாண்டமாக மாறப்போகிறது என்கிறார்கள் நிபுணர்கள்.

செயற்கை நுண்ணறிவு என்பது பொறியியல் மற்றும் அறிவியலின் உதவியால் ஒரு இயந்திரம் அல்லது கணினியானது மனிதத் தலையீடு இல்லாமல் பணிகளைச் செய்வதாகும். உதாரணமாக, முன்பெல்லாம் டோல்கேட்களில் வண்டிகள் வரிசைகட்டி நிற்கும். இப்போது போய் நின்றவுடன் நொடிப்பொழுதில் உங்கள் கணக்கிலிருந்து பணத்தை எடுத்துக்கொண்டு கதவைத் திறந்துவிடுகிறது கம்ப்யூட்டர். இப்படி படிப்படியாக எல்லாத் தொழில்களுக்குள்ளும் செயற்கை நுண்ணறிவு ஊடுருவி வருகிறது. கேட்ட கேள்விக்குப் பதில் தருவது, உங்களுக்காக ஒரு கடிதம் எழுதுவது தொடங்கி, திரைப்படங்கள் எடுப்பது வரை இந்தத் தொழில்நுட்பம் வளர்ந்துவிட்டது.

கம்ப்யூட்டர் படிப்பில் ஹாட் வரவுகள்!

ChatGPT, Google's Bard உள்ளிட்ட சில AI-களின் தோற்றம் பொதுமக்களிடம் மிகுந்த வரவேற்பைப் பெற்றுள்ளது. இது பொறியியல் மாணவர்களிடையே AI, Machine Learning, Cyber Security, Data Science ஆகிய படிப்புகளுக்கான ஆர்வத்தை அதிகரித்துள்ளது. தொழில்நுட்பக் கல்விக்கான அகில இந்திய கவுன்சில் (AICTE), இப்படிப்புகளைத் தொடங்க பொறியியல் கல்லூரிகளை ஊக்குவிக்கிறது. கடந்த ஆண்டு தொழில்நுட்பக் கல்வி கலந்தாய்வில் 14,000 இடங்கள் இப்படிப்புகளுக்காக ஒதுக்கப்பட்டன. மாணவர்கள் மத்தியில் ஏற்பட்டுள்ள வரவேற்பைத் தொடர்ந்து இவ்வாண்டு மட்டும் 134 பொறியியல் கல்லூரிகள் இந்தப் படிப்புகளைத் தொடங்க அண்ணா பல்கலைக்கழகத்துக்கு விண்ணப்பித்துள்ளன. இதன்மூலம் சுமார் 8,490 இடங்கள் அதிகரித்துள்ளன.

தமிழகத்தைப் பொறுத்தவரை B.Tech Artificial Intelligence and Data Science, B.E. CSE (Artificial Intelligence & Machine Learning), B.E. CSE (Cyber Security) மற்றும் B.Tech Artificial Intelligence and Machine Learning போன்ற படிப்புகள் வழங்கப்படுகின்றன. இவை அனைத்தும் 4 ஆண்டு பொறியியல் இளநிலைப் பட்டப்படிப்புகள். தொழில்நுட்பக் கல்வி இயக்ககம் நடந்தும் கலந்தாய்வில் +2 மதிப்பெண் அடிப்படையில் இப்படிப்புகளுக்கான மாணவர்கள் சேர்த்துக்கொள்ளப்படுகிறார்கள். +2வில் கணிதம், இயற்பியல் எடுத்துப் படித்தவர்கள் மட்டுமே விண்ணப்பிக்க முடியும்.

கம்ப்யூட்டர் படிப்பில் ஹாட் வரவுகள்!

“பிளஸ் 1, பிளஸ் 2 கணிதப் பாடங்களில் வரும் டிஃப்ரென்ஷியல் கால்குலஸ், நிகழ்தகவு (Probability), மெட்ரிக்ஸ் ஆகிய பாடங்களே இதற்கு அடிப்படை. இத்துறையைத் தேர்தெடுக்கும் மாணவர்கள் கணிதத்தில் தேர்ந்தவர்களாக இருப்பது அவசியம்” என்கிறார் நார்வே நாட்டின் ஆர்க்டிக் பல்கலைக்கழகத்தில் ஆராய்ச்சியாளராகப் பணியாற்றும் சேஷாத்ரி தனசேகரன்.

இத்துறையில் பட்டம் பெறுபவர்களுக்கு சுகாதாரம், வர்த்தகம், இ-வணிகம், நெட்வொர்க்கிங் மற்றும் தகவல் தொழில்நுட்பம் போன்ற துறைகளில் AI பொறியாளர், வணிக நுண்ணறிவு நிபுணர், டேட்டா சயின்டிஸ்ட், டேட்டா மைனிங் இன்ஜினீயர், மெஷின் லேர்னிங் இன்ஜினீயர் மற்றும் ஆராய்ச்சியாளர் என பல்வேறு நிறுவனங்களில் பணிவாய்ப்புகள் காத்திருக்கின்றன.

‘‘AI படிப்போர் கணித ஆர்வம் கொண்டிருக்க வேண்டும். மேலும், வேகமாக வளர்ந்துவரும் இத்துறையில் பயிற்சி பெற்ற ஆசிரியர்கள் குறைவாகவே உள்ளனர். அதனால் கற்பிக்கும் ஆசிரியர்களின் பணி அனுபவத்தையும் இந்தத் துறையில் அவர்களுக்கு இருக்கும் நிபுணத்துவத்தையும் பார்ப்பது அவசியம். பெரும்பாலும் நகர்ப்புறங்களில் இருக்கும் கல்லூரிகளைத் தேர்ந்தெடுப்பது நல்லது. கல்லூரியில் நல்ல நூலகம் இருப்பது முக்கியம். துறைசார்ந்த உலகளாவிய இதழ்கள் நூலகத்துக்கு வருகிறதா என்று விசாரித்து அறிந்துகொள்ளுங்கள். அந்த இதழ்கள் மூலமாக மாணவர்கள் அப்டேட் செய்துகொள்ள முடியும். மாணவர்களே தேர்வு செய்யும் எலெக்ட்டிவ்ஸ் பாடங்களுக்கு தனியாக அனுபவமுள்ள ஆசிரியர்கள் இருக்கிறார்களா என்பதையும் பார்க்கவேண்டும்.

இளநிலையில் செயற்கை நுண்ணறிவு போன்ற சூப்பர் ஸ்பெஷலைசேஷன் படிப்புகளைத் தேர்வு செய்வது சரியல்ல என்பது கல்வியாளர்களின் ஆலோசனை. இளநிலையில் கோர் படிப்புகளான Computer Science, Information Technology போன்ற படிப்புகளை முடித்துவிட்டு முதுநிலையில் Artificial Intelligence போன்ற ஸ்பெஷலைசேஷன் படிப்புகளைப் படிக்கலாம்’’ என்கிறார் சேஷாத்ரி.

AI தொழில்நுட்பம் அடுத்த பத்தாண்டுகளுக்கு நிலையாக நின்று உலகத்தை ஆளும் என்கிறார்கள் நிபுணர்கள். கணிதத்திலும் கம்ப்யூட்டரிலும் ஆர்வம் உள்ள மாணவர்கள் இந்தப்பக்கம் கவனத்தைத் திருப்பலாம்!

அரசுப் பள்ளி மாணவர்களுக்கும் மருத்துவம் மற்றும் தொழில்முறைப் படிப்புகளில் உரிய பங்கேற்பு கிடைக்க வசதியாக தமிழ்நாடு அரசு சிறப்புச் சட்டம் வழியாகக் கொண்டுவந்ததுதான் 7.5% ஒதுக்கீடு. ஆரம்பத்தில் குறைவான அளவிலேயே மாணவர்கள் இந்த ஒதுக்கீட்டின் வழியாகச் சேர்கிறார்கள். நீட் தேர்வு தாண்டி இன்னும் பல படிப்புகளில் இந்த ஒதுக்கீடு மூலம் சேரமுடியும் என்ற விழிப்புணர்வு மாணவர்களிடமோ பெற்றோரிடமோ இருப்பதில்லை.

இந்தச் சிறப்பு ஒதுக்கீட்டின் வழியாக எந்தெந்தப் படிப்புகளில் சேர முடியும் என்று பார்ப்போம்.

மருத்துவப் படிப்புகள்

MBBS, B.D.S, AYUSH மருத்துவப் படிப்புகளான ஆயுர்வேதா (Bachelor of Ayurvedic Medicine and Surgery - BAMS), யுனானி (Bachelor of Unani Medicine and Surgery -BUMS), சித்தா (Bachelor of Siddha Medicine and Surgery - BSMS), ஹோமியோபதி (Bachelor of Homeopathic Medicine and Surgery - BHMS) ஆகிய படிப்புகளுக்கு நீட் தேர்வு அவசியம். நீட் தேர்வு எழுதி இந்தப் படிப்புகளில் சேரவிரும்புகிற அரசுப் பள்ளி மாணவர்களுக்கு 7.5% ஒதுக்கீடு உண்டு. AYUSH மருத்துவத்தில் BNYS எனப்படும் Bachelor of Naturopathy and Yogic Science, B. Pharm, Occupational Therapy உள்ளிட்ட துணை மருத்துவப் படிப்புகளுக்கு நீட் தேர்வு கிடையாது என்பதால் இந்தச் சிறப்பு ஒதுக்கீடு பொருந்தாது.

கால்நடை மருத்துவ அறிவியல் படிப்புகள்

கால்நடை மருத்துவ அறிவியல் தொடர்பான படிப்புகளை இரு பகுப்பாகப் பிரிக்கலாம். ஒன்று B.V.Sc (Bachelor of Veterinary Science). மற்றொன்று இதிலேயே தொழில்நுட்பம் தொடர்பான படிப்புகள். Dairy Technology, Food Technology, Poultry Technology. இந்தப் படிப்புகளை தமிழ்நாடு கால்நடை மருத்துவ அறிவியல் பல்கலைக்கழகம் வழங்குகிறது. இந்தப் படிப்புகளுக்கான சேர்க்கையில் அரசுப் பள்ளி மாணவர்களுக்கான 7.5% ஒதுக்கீடு உண்டு.

கல்விச் சிறப்பிதழ்

சட்டப் படிப்புகள்

தமிழ்நாட்டில் சட்டப் படிப்புகளை இரண்டு பல்கலைக்கழகங்கள் வழங்குகின்றன. ஒன்று, தமிழ்நாடு டாக்டர் அம்பேத்கர் சட்டப் பல்கலைக்கழகம், மற்றொன்று, ரங்கத்தில் உள்ள தமிழ்நாடு தேசிய சட்டப் பல்கலைக்கழகம். இதில் தமிழ்நாடு தேசிய சட்டப் பல்கலைக்கழகத்தில் சேர்வதற்கு CLAT என்கிற நுழைவுத் தேர்வு எழுதவேண்டும். தேர்வெழுதித் தேர்ச்சி பெற்றவர்களுக்கு 7.5% ஒதுக்கீடு உண்டு. தமிழ்நாடு டாக்டர் அம்பேத்கர் சட்டப் பல்கலைக்கழகத்தில் இரண்டு விதமான விண்ணப்பங்கள் உள்ளன. சீர்மிகு சட்டப்பள்ளிக்கு (School of Excellence) ஒரு விண்ணப்பமும், பல்கலைக்கழகத்தின் இணைப்பு பெற்ற 15 அரசு சட்டக் கல்லூரிகள், 8 தனியார் சட்டக் கல்லூரிகளில் சேர்வதற்கு ஒரு விண்ணப்பமும் உள்ளது. இந்த இரண்டு கல்வி நிறுவனங்களிலும் அரசுப் பள்ளி மாணவர்கள் 7.5% ஒதுக்கீட்டின் வழியாக இணைய முடியும்.

கட்டடக்கலை சார்ந்த படிப்புகள் (Architecture)

அண்ணா பல்கலைக்கழகம் சான்றளிக்கக் கூடிய B.Arch படிப்புகளில், NATA அல்லது JEE 2-A தேர்வு எழுதித் தேர்ச்சி பெற்றவர்கள் சேரலாம். வருடத்திற்கு மூன்று முறை இந்தத் தேர்வு நடக்கும். இரண்டு தேர்வுகள் முடிந்த நிலையில் மூன்றாம் தேர்வுக்கான விண்ணப்பப் பதிவு இப்போது நடந்து வருகிறது. இப்போது படிக்க விரும்புகிற மாணவர்கள் இந்தத் தேர்வுக்கு விண்ணப்பித்து எழுதலாம். ஜூன் 24-ம் தேதி இதற்கான பதிவுகள் முடிவடையும். 7.5% ஒதுக்கீட்டில் ஒட்டுமொத்தமாக இருக்கும் 140 இடங்களில் வருடம்தோறும் ஒற்றை எண்ணிக்கையில்தான் மாணவர்கள் சேர்கின்றனர். கடந்த ஆண்டுக்கு முந்தைய ஆண்டு வெறும் 2 பேரும் சென்ற ஆண்டு 4 பேரும் மட்டுமே சேர்ந்தனர். கட்டடக்கலைப் படிப்புக்கான சேர்க்கை பிளஸ் 2-வில் பெற்ற மதிப்பெண்ணையும் NATA தேர்வில் பெறுகிற மதிப்பெண்ணையும் அடிப்படையாகக் கொண்டு நடைபெறுகிறது.

வேளாண்மை சார்ந்த படிப்புகள்

தமிழ்நாட்டில் வேளாண்மை சார்ந்த படிப்புகளை தமிழ்நாடு வேளாண் பல்கலைக்கழகத்தின் அங்கீகாரம் பெற்ற கல்லூரிகளும் அண்ணாமலைப் பல்கலைக்கழகமும் வழங்குகின்றன. இந்த இரண்டுக்கும் தனித்தனி விண்ணப்பங்கள் அளிக்க வேண்டும். இந்த இரண்டு படிப்புகளுக்கும் இந்த 7.5% ஒதுக்கீடு பொருந்தும்.

மீன்வளம் சார்ந்த படிப்புகள்

மீன்வளம் சார்ந்த படிப்புகள் இந்த ஆண்டு முதல் தமிழ்நாடு வேளாண் பல்கலைக்கழகத்திற்கான விண்ணப்பத்துடனே இணைக்கப்பட்டுள்ளது. இந்தப் படிப்புகளை தமிழ்நாடு டாக்டர் ஜெ.ஜெயலலிதா மீன்வளப் பல்கலைக்கழகம் நடத்துகிறது, இது தவிர அண்ணாமலைப் பல்கலைக்கழகத்திலும் மீன்வளம் சார்ந்த படிப்புகள் உள்ளன. மீன்வளப் படிப்புகளுக்கும் 7.5% ஒதுக்கீடு பொருந்தும்.

பொறியியல் படிப்புகள்

பொறியியலைப் பொறுத்தவரை TNEA வழியாக விண்ணப்பிக்கும்போது இரண்டுவிதமான படிப்புகள் உள்ளன. ஒன்று பொறியியல் சார்ந்தவை. இன்னொன்று B.Plan எனச் சொல்லக்கூடிய கட்டடவியல் மற்றும் அமைப்பியல் கல்லூரியில் நடத்தப்படும் திட்டம் சார்ந்த படிப்புகள். அண்ணா பல்கலைக்கழகத்தின் கலந்தாய்வுக்கு விண்ணப்பிக்க கடைசி தேதி ஜூன் 4. சான்றிதழ்கள் சரிபார்க்க ஜூன் 9 தேதி வரை அவகாசம் உள்ளது. இந்த இரண்டுவித படிப்புகளுக்கும் 7.5% சிறப்பு ஒதுக்கீடு உண்டு.

இந்த எல்லா ஒதுக்கீடுகளும், 6-ம் வகுப்பு முதல் பிளஸ் 2 வரை அரசுப் பள்ளியில் பயின்ற மாணவர்களுக்கு மட்டுமே பொருந்தும். அரசு உதவி பெறும் பள்ளி மாணவர்களுக்குப் பொருந்தாது. அவர்களுக்கும் இந்த ஒதுக்கீடு தரப்பட வேண்டும் என்று தொடர்ச்சியாகக் கோரிக்கைகள் எழுப்பப்படுகின்றன. இருப்பினும் இந்தக் கல்வியாண்டில் கிடைக்க வாய்ப்பில்லை. 7.5% சிறப்பு ஒதுக்கீட்டில் சேரும் மாணவர்களுக்கு கல்விக்கட்டணம், உணவுக் கட்டணம், தேர்வுக் கட்டணம், விடுதிக் கட்டணம் உள்ளிட்ட அனைத்தையும் அரசே செலுத்திவிடும். இதுதவிர மத்திய அரசின் கல்வி நிறுவனங்களான IIT, NIT, AIIMS, IIM போன்ற கல்வி நிறுவனங்களில் படிக்கத் தேர்வுபெறும் அரசுப்பள்ளி மாணவர்களின் கல்விக் கட்டணத்தையும் அரசே ஏற்கும்.

உயர்கல்வியைத் தேர்வு செய்வது எப்படி?

பிளஸ் 2 முடித்தவர்கள் மனதில் எந்தப் படிப்பிற்கு அதிக மதிப்பிருக்கும், எதைப் படித்தால் உடனே வேலை கிடைக்கும் என எக்கச்சக்கமான கேள்விகள் அலைபாய்ந்து கொண்டிருக்கும். அவர்கள் உயர்கல்வியைத் தேர்வு செய்வது எப்படி? கல்வியாளர்கள் சிலரிடம் பேசினோம்.

‘‘உயர்கல்வியைத் தேர்ந்தெடுக்கையில் போகிற போக்கில் கருத்து சொல்பவர்களுக்கு முக்கியத்துவமே கொடுக்கக்கூடாது. அவர்களைப் புறந்தள்ளிவிட வேண்டும்'' என்ற எச்சரிக்கையுடன் ஆரம்பிக்கும் ஜெயப்பிரகாஷ் காந்தி, ‘‘2023-ல் பள்ளிப்படிப்பை முடிக்கும் மாணவர்கள், இன்றைய தேதிக்கு என்ன படிப்பிற்கு அதிக வாய்ப்பும் தேவையும் இருக்கிறதோ அதைத் தேர்ந்தெடுத்துப் படிக்க நினைப்பார்கள். ஆனால், அவர்கள் 2026-27 சமயத்தில் கல்லூரிப் படிப்பை முடித்து வெளியே வரும்போது கல்விச்சூழலும் வேலைவாய்ப்புச் சூழலும் முற்றிலும் வேறாக இருக்கக்கூடும். இன்றைய நிலையை மனதில் கொள்ளாமல் வருங்காலத்தை யோசிக்க வேண்டும்.

தொழில்துறையில் என்னென்ன முன்னேற்றங்கள் நடக்கின்றன, நாம் தேர்ந்தெடுக்கும் துறை சார்ந்து நம்மைத் தனித்துக் காட்ட என்னென்ன சான்றிதழ் படிப்புகள் இருக்கின்றன என்று தேடிப் படிக்க வேண்டும். எல்லாவற்றிலும் அப்டேட் ஆக இருக்க வேண்டும். இது செயற்கை நுண்ணறிவுத் (Artificial Intelligence) துறையின் காலம். வரலாறு படிக்கும் மாணவனுக்கும் AI குறித்துத் தெரிந்திருக்க வேண்டும். AI-யை சமயோசிதமாகப் பயன்படுத்தி விரைவில் வேலையை முடிக்கும் நபர்களுக்கு வேலைவாய்ப்புச் சந்தையில் அதிக மவுசு உண்டாகும் காலம் வரப்போகிறது. ஆனால், நம் பாடப்புத்தகங்கள் அடிப்படையான தொழில்நுட்பங்களை மட்டுமே கற்பிக்கின்றன. கல்லூரியைத் தேர்ந்தெடுக்கும்போது, அந்தக் கல்லூரியில் பாடப்புத்தகத்தைத் தாண்டியும் கற்பதற்கான வெளி இருக்கிறதா என்பதை ஆராய வேண்டும். முதலில் மாணவர்கள் தாங்கள் படிக்க விரும்பும் கல்லூரிகளுக்கு நேரில் சென்று அங்கே என்ன வசதி வாய்ப்புகளெல்லாம் இருக்கின்றன என்பதை அறிய வேண்டும். அந்தக் கல்லூரியில் படித்து நல்ல வேலையில் இருக்கும் நபர்களின் அனுபவத்தைக் கேட்டறிவது சிறப்பு.

சான்றிதழ் படிப்புகளைப் பற்றிய தெளிவும் விழிப்புணர்வும் இருக்க வேண்டும். ‘Prompt Engineering' என்றொரு பாடம் இருக்கிறது. AI பற்றிய புரிதலோடு ‘Prompt Engineering'-கில் சான்றிதழ் படிப்பையும் முடித்தால் கற்பனைக்கு எட்டாத சம்பளத்தில் வேலைவாய்ப்பு கிடைக்கிறது. ஆனால், இதேமாதிரியான படிப்புகளையும் தொழில்நுட்பத்தையும் ஏழை மாணவர்கள் அறிந்துகொள்ள பொருளாதாரம் பெரும் தடையாக உள்ளது. அரசு அடுத்தடுத்து புதிய புதிய கல்லூரிகளைக் கட்டுவதற்கு பதிலாக இருக்கிற கல்லூரிகளில் நவீனத் தொழில்நுட்பங்களை இன்னும் மேம்படுத்தலாம். அது எளிய மாணவர்களுக்குப் பயன் தரும்.

கல்வி உதவித்தொகைகள் பற்றி அறிந்துகொள்ள ‘National Scholarship Portal' என்று ஒரு தளமே இருக்கிறது. ‘NAAC' தரச்சான்றிதழ் பெற்ற கல்லூரிகளில் படிக்கும் ஏழை மாணவர்கள் வங்கிகளில் கடன் வாங்கும்பட்சத்தில் அவர்களின் கடன்மீதான வட்டியை அரசே ஏற்றுக்கொள்வது போன்ற வாய்ப்புகளும் இருக்கின்றன'' என அழுத்தமாகச் சொல்கிறார் ஜெயப்பிரகாஷ் காந்தி.

‘‘நீட் தேர்வு எழுதியிருக்கும் மாணவர்களுக்கு அரசு அல்லது அரசு உதவிபெறும் கல்லூரியில் இடம் கிடைக்கவில்லையெனில் மனம் தளர்ந்துவிடக்கூடாது. சித்தா, ஹோமியோபதி, ஆயுர்வேதிக், யுனானி போன்றவற்றை எடுத்துப் படிக்கலாம். அவையும் எம்.பி.பி.எஸ்-க்கு இணையானவைதான். இதுவும் இல்லையெனில் BMYS என ஒரு படிப்பு இருக்கிறது. அதற்கு நீட் தேவை இல்லை'' என்கிறார் ராஜராஜன்.

‘‘இதைத் தாண்டி துணை மருத்துவப் படிப்புகளையும் தேர்வு செய்யலாம். நர்சிங், பிசியோதெரபி சார்ந்த துணை மருத்துவப் படிப்புகளுக்கும் நல்ல வரவேற்பு இருக்கிறது. இதற்கும் நீட் மதிப்பெண் தேவையே இல்லை. இவற்றைக் கடந்து பார்த்தால், தேசிய பாதுகாப்பு அகாடமியின் நுழைவுத்தேர்வு இன்னும் சில மாதங்களில் நடக்கவிருக்கிறது. அதில் தேர்வானால் படிப்போடு ராணுவத்தில் வேலையும் கிடைக்கும். பி.காம் தேர்வு செய்பவர்கள் கல்லூரிப் படிப்பின்போதே CA, CME, போன்றவற்றையும் சேர்த்துப் படிக்க வேண்டும். முழுநேரப் படிப்போடு சான்றிதழ் படிப்பைப் படிக்க நினைப்பவர்களுக்கு சென்னை ஐ.ஐ.டி நல் வாய்ப்புகளை வழங்கிவருகிறது. B.Sc Data Science & Programming மற்றும் B.Sc Electronic & Embedded System போன்ற ஆன்லைன் படிப்புகளை ஐ.ஐ.டி வழங்கிவருகிறது. இதைப் படிப்பதற்கு ஏழை மாணவர்களுக்கு உதவித்தொகையையும் ஐ.ஐ.டி வழங்குகிறது'' என்கிறார் அவர்.

ஜெயப்பிரகாஷ் காந்தி - ராஜராஜன்

‘‘அரசுப்பணிக்கெனத் தயாராகும் மாணவர்கள் கல்லூரிப் படிப்பைத் தாண்டியும் சில விஷயங்களில் கவனம் செலுத்த வேண்டும். ஆளுமைத் திறனையும் சமயோசிதத் திறனையும் தொடர்ந்து மேம்படுத்திக்கொண்டே இருக்க வேண்டும். சிலருக்கு சிவில் சர்வீஸில் தேர்ச்சியாக வேண்டும் என்கிற கனவு இருக்கும். சிவில் சர்வீஸ் தேர்வை எழுத ஏதேனும் ஒரு இளங்கலை டிகிரியே போதுமானது. மெயின்ஸ் தேர்வில் எதை விருப்பப்பாடமாகத் தேர்ந்தெடுப்பது என்பதைப் பற்றியெல்லாம் இப்போதே யோசிக்காமல் முதலில் அந்த முதல்நிலைத் தேர்வை எப்படி பாஸ் செய்வது என்பதைப் பற்றியே யோசிக்க வேண்டும்'' என்கிறார் ராஜராஜன்.

விஷுவல் கம்யூனிகேஷன் என்பது தனித்துவமான படிப்பு. கிரியேட்டிவ் திறன் சார்ந்தது. நவீனத் தொழில்நுட்பங்கள் வழி கற்பனைக்கு உயிர்கொடுக்கும் படிப்பு. உலகம் முழுவதும் வேலைவாய்ப்பும் தேவையும் உள்ள இந்தப்படிப்பு இளைஞர்களை ஈர்ப்பதில் வியப்பில்லைதான். ஆனால் ஏராளமான விஸ்காம் பட்டதாரிகள் பலவிதக் கனவுகளோடு படிப்பை முடித்துவிட்டு, வேலையில்லை என்று வீட்டில் உட்கார்ந்திருக்கிறார்கள் என்பதுதான் கவனிக்க வேண்டிய முரண்.

விஸ்காம் என்பது சினிமா சார்ந்த படிப்பு என்று நிறைய பேர் நினைக்கிறார்கள். அந்த எண்ணத்துடனே கல்லூரிக்கு வருகிறார்கள். படித்து முடித்ததும் சினிமாத்துறையிலிருந்து வீட்டுக்கு அழைப்பு வரும் என்று நம்புகிறார்கள். உண்மையில் திரைப்பட இயக்கம், ஒளிப்பதிவு, ஒலிப்பதிவு பற்றியெல்லாம் சொல்லிக்கொடுக்க சென்னைத் திரைப்படக் கல்லூரி போன்ற கல்வி நிறுவனங்கள் தனியாக இயங்குகின்றன. போட்டோகிராபி, ஆவணப்படம், குறும்படம், சமூக ஊடகங்கள், பிரின்டிங், ரேடியோ, மக்கள்தொடர்பு, விளம்பரப் படங்கள், ஈவென்ட், இதழியல், அனிமேஷன், விஷுவல் எபெக்ட்ஸ், சவுண்ட் டெக்னாலஜி, எடிட்டிங், கிராபிக்ஸ் எனப் பல்வேறு தொழில்நுட்பங்களை உள்ளடக்கிய படிப்பு அது. வெறும் சினிமாக் கனவுகளோடு மட்டும் இந்தப் படிப்பை எடுத்துப் படிக்கக்கூடாது. விஷுவல் கம்யூனிகேஷன் பாடப்பிரிவுகளில் எது நமக்கானது என்ற சுயதேர்வு மூன்று வருடங்களில் உங்களுக்கு வந்துவிட வேண்டும். அதில் உங்களை முழுமைப்படுத்திக்கொண்டால் நிச்சயம் பிரகாசமான வாய்ப்புகள் உண்டு.

விஷுவல் கம்யூனிகேஷன்

+2-வில் வணிகவியல், அறிவியல் என எந்தப் பிரிவை எடுத்துப் படித்திருந்தாலும் மூன்றாண்டுக் கால இளநிலை விஷுவல் கம்யூனிகேஷன் படிப்புக்கு விண்ணப்பிக்கலாம். விஷுவல் தொழில்நுட்பங்களில் ஆர்வம் மற்றும் பிளஸ் டூ மதிப்பெண் அடிப்படையில், பெரும்பாலான கல்லூரிகளில் மாணவர் சேர்க்கை நடக்கும். பெங்களூரு செயின்ட் ஜோசப் பல்கலைக்கழகம், சென்னை லயோலா கல்லூரி, பாரதியார் பல்கலைக்கழகம் உள்ளிட்ட சில கல்வி நிறுவனங்கள் நுழைவுத்தேர்வு அடிப்படையில் மாணவர்களைச் சேர்க்கின்றன.

B.A Visual Communication, B.Sc Visual Communication, B.Des (Visual Communication) எனக் கல்வி நிறுவனங்களுக்கு ஏற்றபடி இளநிலைப் படிப்புகள் வழங்கப்படுகின்றன. ஆயினும் பாடத்திட்டத்தைப் பொறுத்தவரை பெரிய வேறுபாடுகள் இருக்காது.

“விஸ்காம் என்பது வெப் டிசைனிங், கிராபிக்ஸ் டிசைனிங், பிரின்டிங் பப்ளிகேஷன், மல்டி மீடியா, அட்வர்டைசிங், போட்டோகிராபி, சவுண்ட் டெக்னாலஜி, வீடியோகிராபி, அனிமேஷன் எனக் காட்சித் தொடர்புகளில் மாணவர்களின் திறன்களை வளர்க்கும் படிப்பு. சினிமா மட்டுமன்றி, போட்டோகிராபி, விளம்பரத்துறை எனப் பல துறைகளில் இப்படிப்பைப் படித்தவர்கள் உயரிய பொறுப்புகளில் இருக்கிறார்கள். OTT தளங்களின் அதிகரிப்பு மற்றும் சமூக ஊடகங்களின் வளர்ச்சி காரணமாக விஸ்காம் படித்தவர்களுக்கான வாய்ப்பு இன்னும் அதிகரிக்கவே செய்யும். இந்தப் படிப்பின் பாடத்திட்டம், தொழில்நுட்ப வளர்ச்சிக்கேற்ப ஆண்டுக்காண்டு மாறிக்கொண்டே இருக்கிறது. இளநிலை முடித்த மாணவர்கள் முதுநிலையில் குறிப்பிட்ட துறையைத் தேர்வுசெய்து படித்தால் மிகச்சிறந்த எதிர்காலம் அமையும்’’ என்கிறார் லயோலா கல்லூரி விஸ்காம் துறைத் தலைவர் இருதயராஜ்.

சேது, திருவாசகம், இருதயராஜ்

‘‘விஸ்காம் படிப்பவர்கள், கல்லூரிகளில் சொல்லித்தரும் தியரிகளைத் தாண்டி செயல்முறைப் பயிற்சி எடுத்துக்கொள்வது நல்லது. கூடவே, தொடர்புள்ள விஷயங்களைத் தனியாகக் கற்றுக்கொண்டால் படிப்பை முடித்ததும் உடனடியாக வேலை கிடைக்கும்’’ என்கிறார் விஸ்காம் முடித்துவிட்டு எடிட்டராகப் பணியாற்றும் தாம்பரத்தைச் சேர்ந்த சேது.

‘‘விஷுவல் கம்யூனிகேஷனை, காட்சித் தொடர்பியல் குறித்த ஓர் அறிமுகப் படிப்பாகக் கருதவேண்டும். அத்துறையில் இருக்கும் பல்வேறு வாய்ப்புகள் குறித்த அடிப்படையான விஷயங்கள் இப்படிப்பில் இருக்கும். மாணவர்கள், இதில் எது தங்களுக்கு உகந்ததாக இருக்குமோ அதை அடையாளம் கண்டு தங்களை மேம்படுத்திக்கொள்ள வேண்டும். ‘கேமரா என்பது ஒரு அறிவியல் சாதனம். அது நீங்கள் படம் பிடித்தாலும் படம் பிடிக்கும்... நான் படம் பிடித்தாலும் பிடிக்கும். ஆனால் அதைவைத்து நீங்கள் என்ன செய்கிறீர்கள் என்பதைப் பொறுத்துதான் எல்லாமே இருக்கிறது' என்று பாலு மகேந்திரா சொல்லுவார். அது விஸ்காம் படிப்புக்கும் பொருந்தும். இது வெறும் தொழில் சார்ந்த படிப்பு மட்டும் கிடையாது. படைப்புத்திறன் சம்பந்தப்பட்டது. இந்தப் படிப்பில் சேரும் மாணவர்கள் படைப்பாற்றல் திறனை மேம்படுத்திக்கொள்ள வேண்டும். படிப்பதற்குச் சிறந்த கல்லூரியைத் தேர்வு செய்யவேண்டும். அதுதான் மிகவும் முக்கியமானது...’’ என்கிறார் விஸ்காம் துறை ஆசிரியர் திருவாசகம்.

விஷுவல் கம்யூனிகேஷன் முடித்தவர்களுக்கு OTT தளங்களில் நிறைய வேலைவாய்ப்புகள் உண்டு. Facebook, Google போன்ற நிறுவனங்களில் UX/UI வடிவமைப்பாளர்களாகப் பலர் பணிபுரிகின்றனர். Zoho, அமேசான் போன்ற IT நிறுவங்களின் பிராண்ட் மேலாளர், கிராபிக் டிசைனர்/விஷுவல் டிசைனர், illustrator போன்ற பணி வாய்ப்புகளும் விஷுவல் கம்யூனிகேஷன் பட்டதாரிகளுக்கு இருக்கின்றன. போஸ்டர் டிசைனர், பப்ளிசிட்டி டிசைனர், புகைப்படக் கலைஞர் என பலர் தற்சார்பாக அதிக வருமானத்தை ஈட்டுகிறார்கள்.

‘ஏணியைக் கூரைக்குப் போடாதே, வானத்துக்குப் போடு' என்பார்கள். விஷுவல் கம்யூனிகேஷன் மாணவர்களுக்கும் அது பொருந்தும். படிப்பை முடித்தவுடன் சினிமாத்துறை நம்மைக் கைகூப்பி அழைத்து அரவணைத்துக்கொள்ளும் என்று நம்பாமல் தங்களுக்கேற்ற துறையைக் கண்டுபிடித்து அடுத்தடுத்து மேம்படுத்திக்கொள்ள வேண்டும்!

விஷுவல் கம்யூனிகேஷன்

விஸ்காம் எதிர்காலம்!

இளநிலை விஷுவல் கம்யூனிகேஷன் படிக்க, கல்லூரியைப் பொறுத்து ஆண்டுக்கு 45,000 முதல் 7 லட்சம் ரூபாய் வரை செலவாகலாம். ஒரு சில கல்லூரிகள், கேமரா, லேப்டாப் சொந்தமாக வைத்திருக்கவேண்டும் என்று வலியுறுத்துகின்றன. இளநிலை படிப்பு முடித்தவர்கள், விஷுவல் கம்யூனிகேஷனில் M.Sc, MA படிக்கலாம். தவிர, MA Graphic Design, M.Sc Programme in Digital Filmmaking, M.Sc Digital Film, M.Sc Multimedia, Master's in Advertising and Public Relations, Master's in Digital Media, Master's in Visual Effects, Master of Fine Arts, Masters in Visual Design, PG Diploma/Master in Animation போன்ற படிப்புகளையும் தேர்தெடுக்கலாம். VFX/Special Effects courses, Illustration Courses, Graphic Design Courses, Web Design Courses போன்ற துறைகளில் ஆர்வம் கொண்டவர்கள் அதற்கான குறுகிய கால டிப்ளோமா படிப்புகளைத் தேர்வு செய்து படிப்பது எதிர்காலம் சிறக்க உதவும்.

விஷுவல் கம்யூனிகேஷன்

விஷுவல் கம்யூனிகேஷன் படிக்க விரும்பும் மாணவர்களுக்கு சில ஆலோசனைகள்:

* நல்ல கல்லூரியைத் தேர்வு செய்வது முக்கியம். வெறும் தியரியை மட்டும் கற்பிக்காமல், செய்முறைப் பயிற்சிகள் தரக்கூடிய கல்லூரியாக இருக்கிறதா என்பதைப் பாருங்கள்.

* அனைத்து மாணவர்களும் பயன்படுத்தும் அளவுக்குத் தொழில்நுட்ப ஆய்வக வசதிகள் இருக்கின்றனவா என்பது முக்கியம்.

* துறை சார்ந்த அனுபவம் கொண்ட ஆசிரியர்கள் இருக்கிறார்களா என்று பாருங்கள். அத்துறையில் வேலை செய்துகொண்டே பணியாற்றும் ஆசிரியர்கள் இருந்தால் மிகவும் நல்லது.

* இந்தக் கல்லூரியில் முன்பு பயின்ற மாணவர்கள் இப்போது இதே துறையில் பணியாற்றுகிறார்களா என்று பார்க்க வேண்டும்.

உழைப்பும் ஓய்வும் இரு கண்கள்

நன்றி ஆனந்த விகடன்

மே தினம் என்னும் தொழிலாளி வர்க்கத்தின் திருவிழா இந்தியாவில் கொண்டாடப்பட்டதன் நூற்றாண்டு இது. இந்தியாவில் மே தினம் முதன்முதலில் கொண்டாடப்பட்டது தமிழ்நாட்டில் என்பதும், அதை முன்னெடுத்தவர் ‘தென்னிந்தியாவின் முதல் கம்யூனிஸ்ட்' என்று அழைக்கப்படும் சிங்காரவேலர் 

இந்தியாவிலேயே முதன்முதலில் மே தினம் கொண்டாடப்பட்டதும் தமிழ்நாட்டில்தான்; முதன்முதலில் தொழிற்சங்கம் உருவாக்கப்பட்டதும் தொழிற்சங்கத்தின் சார்பில் பின்னி மில் வேலைநிறுத்தப் போராட்டம் நடைபெற்றதும் தமிழ்நாட்டில்தான்; தொழிற்சங்கம் என்ற ஒன்று உருவாக்கப்படுவதற்கு முன்பே 1908-ல் திருநெல்வேலி கோரல் மில் நிர்வாகத்தை எதிர்த்து வ.உ.சி தலைமையில் மாபெரும் தொழிலாளர் கிளர்ச்சி நடைபெற்றதும் தமிழ்நாட்டில்தான்

வரையறையற்ற வேலை நேரத்தில் தொழிலாளர்கள் கசக்கிப் பிழியப்பட்ட போதுதான் உலகமெங்கும் தொழிலாளர் இயக்கங்கள் தோன்றின. முதலில் ‘பத்துமணி நேர வேலை' என்று முன்வைக்கப்பட்ட கோரிக்கை, பிறகு ‘எட்டுமணி நேர வேலை' என்பதாக மாறியது. ‘எட்டுமணிநேர வேலை, எட்டுமணி நேர உறக்கம், எட்டுமணி நேர ஓய்வு' என்று ஒருநாள் பிரிக்கப்பட்டு தொழிலாளர்களுக்கான உரிமைகள் வலியுறுத்தப்பட்டன. ஆனால் இந்த உரிமைகள் சாதாரணமாகக் கிடைத்துவிடவில்லை.

குடும்பத்துக்காகத் தியாகம் செய்து உழைப்பது ஒருவரை உயர்த்தும் என்பது உண்மைதான். ஆனால், அந்த உழைப்புக்காக வாழ்வையே தியாகம் செய்வதில் என்ன மிஞ்சும்? தினமும் பல மணி நேரம் பயணம் செய்து உழைக்க நேரும் மனிதர்களிடம், ‘எப்போது நீங்கள் கடைசியாக சூரிய உதயத்தையோ, அஸ்தமனத்தையோ நிதானமாகப் பார்த்து ரசித்தீர்கள்' என்று கேட்டுப் பாருங்கள். அவர்களின் விரக்திப் புன்னகைக்குள் ஆயிரம் அர்த்தங்கள் தெரியும்.

இந்தியாவுக்கு உரிமைகளை உச்சரிக்கும் உதடுகளாக விளங்குவது தமிழ்நாடுதான். பணிப்பாதுகாப்பு, வரையறுக்கப்பட்ட வேலைநேரம் ஆகியவற்றை நாம் கொஞ்சம் கொஞ்சமாக இழந்து கொண்டிருக்கும் தருணத்தில்தான் தற்பொழுது தமிழ்நாடு அரசு 12 மணி நேர வேலைத் திட்டத்தை அங்கீகரித்து சட்டம் இயற்றியிருக்கிறது. (எதிர்ப்புகளைத் தொடர்ந்து இதன் செயலாக்கத்தை நிறுத்திவைப்பதாக இப்போது தமிழ்நாடு அரசு அறிவித்திருக்கிறது!) 

இந்த 12 மணி நேர வேலை என்பதை, ‘தொழிலாளர்கள் தொடர்ந்து மூன்று நாள்கள் விடுப்பு எடுப்பதற்கான வாய்ப்பு’ என்று முகமூடி போட்டு முன்னிறுத்துகிறார்கள். உண்மையில் தொழிலாளர்கள் வாரத்தில் மூன்று நாள்கள் ஓய்வெடுக்க வேண்டும் என்ற அக்கறையில் கொண்டுவரப்பட்ட மசோதாவா இது? இல்லை, இது தொழில் நிறுவனங்களின் தேவை. ‘வேலை நேரத்தில் இப்படிப்பட்ட நெகிழ்வுத் தன்மையை தமிழ்நாட்டில் முதலீடு செய்யும் பன்னாட்டு நிறுவனங்கள் எதிர்பார்க்கின்றன’ என்று தொழில்துறை அமைச்சர் தங்கம் தென்னரசு வெளிப்படையாகவே ஒப்புக்கொள்கிறார். 

1948-ம் ஆண்டின் தொழிற்சாலைகள் சட்டத்தில் இதன்மூலம் தமிழ்நாடு அரசு கொண்டுவந்திருக்கும் விதிவிலக்குகள் ஏராளம். வாரத்தில் 48 மணி நேரம் மட்டுமே ஒருவர் பணிபுரிய வேண்டும் என்பதிலிருந்து விலக்கு, ஞாயிற்றுக்கிழமை வேலை செய்யக்கூடாது என்பதிலிருந்து விலக்கு, ஒருநாளில் 9 மணி நேரத்துக்கு மேல் வேலை செய்யக்கூடாது என்பதிலிருந்து விலக்கு, குறைந்தபட்சம் அரை மணி நேரமாவது ஓய்வெடுக்காமல் தொடர்ச்சியாக 5 மணி நேரத்துக்கு மேல் வேலை பார்க்கக்கூடாது என்பதிலிருந்து விலக்கு, ஒரு நாளில் 9 மணி நேரத்துக்கு அதிகமாகவோ அல்லது ஒரு வாரத்தில் 48 மணி நேரத்துக்குக் கூடுதலாகவோ வேலை பார்த்தால் சாதாரண ஊதியத்தைப் போல இரண்டு மடங்கு அளவுக்கு ஓவர்டைம் ஊதியம் தர வேண்டும் என்பதிலிருந்தும் விலக்கு.

தொழிலாளர் நலச் சட்டங்கள் அனைத்தையும் அரசுகள் கலைத்துப் போடு வதற்கு கொரோனாவைப் பயன் படுத்திக் கொண்டன. தொழிலாளர் விதிகளில் மத்திய அரசு 2020 நவம்பரில் கொண்டுவந்த திருத்தம், தினமும் 12 மணி நேரம் வரை ஊழியர்களை வேலை வாங்க அனுமதித்தது. அதற்கு முன்பாகவே குஜராத், ராஜஸ்தான், ஹரியானா, மத்தியப்பிரதேசம், பஞ்சாப் மற்றும் இமாசலப்பிரதேசம் என்று ஆறு மாநில அரசுகள், 12 மணி நேர ஷிப்ட்டை நடைமுறைக்குக் கொண்டுவந்துவிட்டன. இதில் குஜராத் மஸ்தூர் சபா போட்ட வழக்கை அடுத்து, குஜராத் அரசு கொண்டுவந்த திருத்தத்தினை உச்ச நீதிமன்றம் ரத்து செய்தது.

இந்நிலையில் 12 மணி நேர வேலைத் திட்டம், இரவு ஷிப்டிலும் பெண்கள் வேலை செய்ய அனுமதி, ஓவர்டைம் நேரம் இரண்டு மடங்காக அதிகரிப்பு என்று கர்நாடகா சில மாதங்களுக்கு முன்பு சட்டங்களை மாற்றியது. தமிழ்நாடும் அதே மாற்றங்களைக் கொண்டு வந்திருப்பதுதான் ஆச்சர்யம்.

சில நிறுவனங்கள் மட்டுமே இதைப் பின்பற்றும்' என்கிறது அரசு. ஆனால், இது தொற்றுநோய் போல! ஒரு நிறுவனத்திலிருந்து இன்னொரு நிறுவனத்துக்கு வேகமாகப் பரவும். ‘தொழிலாளர் விரும்பினால் 12 மணி நேரம் வேலை பார்க்கலாம். இல்லையெனில் மறுக்கலாம்' என்கிறது அரசு. ‘விருப்பமில்லை’ என்று மறுக்கும் உரிமை ஒரு தொழிலாளிக்கு இருக்கிறதா? அப்படி மறுக்கும் தொழிலாளியை வேலையில் தொடர்வதற்கு விட்டுவைக்குமா ஒரு நிறுவனம்?

‘‘8 மணி நேர வேலையென்பது நூற்றாண்டு காலப் போராட்டத்தின் மூலம் தொழிலாளர் வர்க்கம் பெற்ற உரிமை. இன்று உலகம் முழுவதும் முதலாளித்துவ நெருக்கடி அதிகரித்திருக்கிறது. அரசியல் மட்டத்திலும் அவர்களின் கை ஓங்கியிருக்கிறது. அவர்கள் நலனைப் பாதுகாக்கவே அரசுகள் பெரிதும் முனைப்புக் காட்டுகின்றன. தமிழக அரசும் அந்த நெருக்குதலுக்குப் பணிந்துவிட்டது. ஐ.டி, எலெக்ட்ரானிக் நிறுவனங்கள் வைத்த கோரிக்கைகளின்படியே இந்த 12 மணி நேர வேலை மசோதா கொண்டு வரப்படுவதாக சட்டசபையில் அமைச்சர் தெரிவித்திருக்கிறார். இந்த மசோதாவின் நோக்கமே 8 மணி நேர வேலை என்ற சட்டபூர்வ உரிமையை காலிசெய்வதுதான். உண்மையில் ஒரு மனிதர் 12 மணி நேரம் ஒரே வேலையைப் பார்க்கவே முடியாது.

ஐ.டி துறையைப் பொறுத்தவரை 12 மணி நேர வேலை, 14 மணி நேர வேலையெல்லாம் சர்வசாதாரணம். 12 மணி நேர வேலை என்பதை சட்டபூர்வமாக்கிவிட்டால் ஐ.டி நிறுவனங்கள் அதற்கு மேலும் வேலை வாங்கும். ஐ.டி நிறுவனங்களில் சங்கங்கள்கூட வலுவாக இல்லை. ஏற்கெனவே அடிமைகளாக இருப்ப வர்களை இந்த மசோதா கொத்தடிமைகளாக மாற்றப்போகிறது.

‘சாப்ட்வேர், எலெக்ட்ரானிக் நிறுவனங்களின் கோரிக்கையை ஏற்றுதான் இந்தச் சட்டத்தைக் கொண்டு வந்திருக்கிறோம் என்கிறார்கள் அமைச்சர்கள். ஆனால், தற்போது கொண்டு வரப்பட்டுள்ள தொழிற்சாலைகள் சட்டத்தின் கீழ் ஐ.டி நிறுவனங்கள் பதிவு செய்யப்படுவதில்லை. Tamilnadu Shops and Establishments Act-ன் கீழ்தான் பதிவு செய்யப்படும். தமிழகத்தைப் பொறுத்தவரை ஐ.டி நிறுவனங்களுக்கான வரையறை தெளிவாகவே இல்லை.

ஐ.டி நிறுவனங்களைக் கண்காணிக்க தமிழக அரசிடம் சிஸ்டமே இல்லை. சட்டத்தில் இருக்கும் எந்தச் சலுகையும் அங்கு பணியாற்றும் ஊழியர்களுக்குக் கிடைப்பதேயில்லை. நாங்கள் அரசுக்குப் புகார் அளித்தாலும் விசாரிக்கிறோம் என்று கூறி இழுத்தடித்துச் சோர்வடையச் செய்துவிடுவார்கள்.

நாங்கள் 48 மணி வேலை நேரத்தை 30 மணி நேரமாகக் குறையுங்கள் என்று கோரிக்கை விடுத்துக்கொண்டிருக்கிறோம். நான்காவது தொழில்புரட்சிக்காலம் இது. தொழில்நுட்பங்கள் நாளுக்கு நாள் மாறிக்கொண்டே இருக்கின்றன. ஆண்டுக்கு மூன்று முதல் நான்கு சான்றிதழ்களை நாங்கள் நிறுவனங்களுக்குக் காட்ட வேண்டியிருக்கிறது. படிக்காவிட்டால் இந்தத்துறையில் தாக்குப்பிடிக்கவே முடியாது. இன்று தனிப்பட்ட வாழ்க்கையை, குடும்பத்தை இழந்துதான் ஐ.டி ஊழியர்கள் தங்களை அப்டேட் செய்துகொள்கிறார்கள். அதன் விளைவாக நிறைய குழந்தையின்மைப் பிரச்னைகள், விவாகரத்துகளை எதிர்கொள்கிறார்கள். இதைத் தமிழக அரசு புரிந்துகொள்ள வேண்டும்...'' என்கிறார் மென்பொருள் துறை தொழிலாளர் சங்கத்தின் பொதுச்செயலாளர் அழகுநம்பி வெல்கின்.

‘‘பழைய தொழிற்சாலைச் சட்டம் வாரத்துக்கு 48 மணி நேர வேலையை உறுதிப்படுத்துகிறது. மூன்று மாதங்களுக்கு 75 மணி நேரம் ஓவர்டைம் செய்யவும் அனுமதிக்கிறது. ஓவர் டைமுக்கு உரிய சம்பளம் தரவேண்டும். பத்து நாள்களுக்குள் ஒருநாள் விடுமுறை கட்டாயம் தரப்பட வேண்டும். ஒருவேளை ஞாயிற்றுக்கிழமை விடுமுறை வழங்கமுடியாவிட்டால் தொழிலாளருக்கு முன்கூட்டியே தெரியப்படுத்தி அடுத்தடுத்த நாள்களில் வழங்க வேண்டும். இப்படிப் பல பாதுகாப்பு அம்சங்களைக்கொண்டிருக்கிறது.

தற்போது கொண்டு வந்திருக்கும் சட்டத்தை வெறும் 12 மணி நேர வேலைச் சட்டம் என்று சுருக்கிப் பார்க்கிறார்கள். உண்மையில் தொழிலாளர் சட்டம் இதுவரை அளித்த எல்லாச் சலுகைகளையும் இந்தப் புதிய சட்டம் நீக்கியிருக்கிறது

முன்பு தொழிலாளர்கள் எத்தனை மணி நேரம் வேலை செய்ய வேண்டும் என்பதை அரசு தீர்மானித்தது. இனி தொழிற்சாலைகளே தீர்மானித்துக்கொள்ளலாம். தொழிலாளர்கள் இனி எந்தக்குரலையும் எழுப்ப முடியாது. தொழிற்சங்கங்களும் செயல்பட முடியாது. இதில் இன்னொரு அபாயமும் இருக்கிறது. வேலை நேரத்தை நிறுவனமே தீர்மானித்துக் கொள்வதற்கான வாய்ப்பை வழங்குவதன்மூலம், கூடுதலாக சம்பளம் வாங்குபவர்களை இனி நீங்கள் 5 மணி நேரம் வேலை செய்தால் போதும் என்று அனுப்பிவிட்டு, குறைந்த சம்பளம் வாங்குபவர்களை அதிக நேரம் வைத்து வேலை வாங்கும் நிலைகூட ஏற்படலாம். இப்படியொரு நிலை ஏற்பட்டால் தொழிலாளர்கள் எங்கும் இதுகுறித்துப் புகார் செய்ய முடியாது. சட்டம் நிறுவனங்களுக்கு சாதகமாகவே இருக்கும்.

கம்யூனிச சீனாவில் வேலைக்கலாசாரம் மோசம். இதை ‘996' என்பார்கள். தினமும் காலை 9 மணி முதல் இரவு 9 மணி வரை வாரத்தில் 6 நாள்கள் வேலை. ‘இந்த வாய்ப்பு கிடைத்தவர்கள் ஆசீர்வதிக்கப்பட்டவர்கள்' என்று சோஷியல் மீடியாவின் டார்லிங்காக இருக்கும் சீனத் தொழிலதிபர் ஜாக் மா சொல்வார். ஆனால், அது வரமல்ல, சாபம். இந்த வேலை நெருக்கடி தாளாமல் அங்கு தற்கொலைகள் அதிகரித்திருக்கின்றன. சீனக் குடும்பங்களில் குழந்தை பிறப்புகள் குறைந்திருப்பதற்கும் இந்த வேலை நேர நெருக்கடிக்கும் நேரடித் தொடர்பு இருப்பதாகப் பல ஆய்வுகள் சொல்கின்றன.

மாறிவரும் வேலை நேரமும் உற்பத்தி உயர்வும் 

ஐரோப்பிய நாடுகளில் வேலை நேரம் குறைக்கப்பட்டுள்ளது. அதனால் உற்பத்தி அதிகரித்துள்ளது. போதிய ஓய்வு கொடுத்துத் தொழிலாளர்களிடம் வேலை வாங்கும்போது உற்பத்தித்திறன் கூடும் என்பது உலகளாவிய உண்மை.

4 DAY WEEK GLOBAL- 4DWG’ எனும் நிறுவனம் பாஸ்டன் கல்லூரி மற்றும் கேம்பிரிட்ஜ் பல்கலைக்கழகத்துடன் இணைந்து வாரத்தில் நான்கு நாள்கள் வேலையை இங்கிலாந்தின் பல தொழில் நிறுவனங்களில் செயல்படுத்தி வருகிறது. அதற்குமுன்பே உலகெங்கிலும் நான்கு நாள் வேலைத் திட்டத்தைப் பல நிறுவனங்கள் மற்றும் நாடுகள் நடைமுறைப்படுத்திப் பார்த்தன.

ஐஸ்லாந்தில் 2015-ம் ஆண்டில் வேலை நேரத்தை வாரத்திற்கு 40 மணிநேரத்திலிருந்து 35-36 மணிநேரமாகக் குறைத்தனர், ஊதியத்தில் எந்தக் குறைவும் இல்லாமல். பல ஆண்டுகளாக இந்த சோதனை நடத்தப்பட்டது . இச்சோதனையின் வெற்றியால் 2021-ம் ஆண்டு குறுகிய வேலை வாரத்தை நிரந்தரக் கொள்கையாக ஐஸ்லாந்து அரசு மாற்றியது. ஸ்வீடனில் 2015-ல் முழு ஊதியத்துடன் நான்கு நாள் வேலை வாரம் அறிமுகமானது. சோதனையில் பணத்தைச் செலவழிக்கும் முறை அதிகரித்ததால் தொழிலாளர்கள் மகிழ்ச்சியடையவில்லை.

ஜப்பான் நாட்டில் மைக்ரோசாப்ட் நிறுவனம் சோதனை முயற்சியாக 2019 ஆகஸ்டில் ஊழியர்களுக்கு தொடர்ந்து ஐந்து வெள்ளிக்கிழமைகள் விடுமுறை வழங்கியது. சோதனை வெற்றிகரமாக இருந்தது, உற்பத்தித்திறன் 40% அதிகரித்தது. ஊழியர்கள் 25% குறைவான நாள்கள் விடுமுறை எடுத்தனர். ஸ்பெயின் அரசு, 2021-ல் நான்கு நாள் வேலை வாரத்தை ஊதியத்தில் எந்தக் குறைப்பும் இல்லாமல் அறிமுகப்படுத்த முற்பட்டது. இது இன்னும் செயல்படுத்தப்படாமல் திட்டமிடல் நிலையிலேயே உள்ளது. யூனிலீவர் நிறுவனம் நியூசிலாந்தில் இந்த சோதனையை 12 மாதங்களுக்கு நடத்தியது. அதில் அனைத்து ஊழியர்களுக்கும் வாரத்தில் நான்கு நாள்கள் வேலை செய்ததற்கு அதே ஐந்து நாள்களுக்கான ஊதியத்தை வழங்கியது.

கடந்த 2022 பிப்ரவரியில், பெல்ஜியம் ஊழியர்கள் சம்பளத்தை இழக்காமல் வழக்கமான ஐந்து நாள்களுக்குப் பதிலாக நான்கு நாள்களில் வாரத்தின் முழு வேலையையும் செய்யும் உரிமையைப் பெற்றனர். வாரத்தில் நான்கு அல்லது ஐந்து நாள்கள் வேலை செய்வது பற்றி ஊழியர்கள் முடிவு செய்ய அனுமதிக்கும் மசோதா அங்கு நவம்பர் 21 முதல் அமலுக்கு வந்தது.

மிகக் குறுகிய சராசரி வேலை வாரங்களின் தாயகம் ஜெர்மனி என்று கூறலாம். உலகப் பொருளாதார மன்றத்தின் (WEF) கருத்துப்படி அங்கு வாரத்தின் சராசரி வேலை நேரம் 34.2 மணி நேரம்தான். ஆனாலும், தொழிற்சங்கங்கள் வேலை நேரத்தை மேலும் குறைக்க வேண்டும் என்று கோரிக்கை விடுத்துள்ளன. இது வேலைகளைத் தக்கவைக்கவும், பணிநீக்கங்களைத் தவிர்க்கவும் உதவும் என்று வாதிடுகின்றன.

ஒட்டுமொத்தமாக, நான்கு நாள் வேலை வாரம் என்பது உலகம் முழுவதும் பரவலாகத் தொடங்கியுள்ளது. ஆனால், அங்கெல்லாம் வேலை நேரமும் சேர்த்துக் குறைக்கப்பட்டுள்ளது

‘‘நரகத்தில் இருப்பது போல வேலை செய்யுங்கள். வாரத்தில் 80 முதல் 100 மணி நேரம் வேலை செய்பவர்களை சீக்கிரம் வெற்றி நெருங்கும். மற்றவர்கள் வாரத்தில் 40 மணி நேரம் வேலை பார்த்து ஓராண்டில் அடையும் இடத்தை, நீங்கள் நான்கே மாதங்களில் அடைந்துவிடுவீர்கள்.'' இது இளம் தொழிலதிபர்களுக்கு எலான் மஸ்க் சொல்லும் அறிவுரை. அவர் அப்படித்தான் வேலை செய்கிறார். ஆனால், அவர் வெறுமனே ஆபீஸில் தன் இருக்கையில் உட்கார்ந்து வேலை பார்ப்பதில்லை. பிசினஸ் பயணங்களையும் அவர் வேலை நேரமாகக் கணக்கிடுகிறார் என்றாலும், அப்படி உழைப்பதுகூட நல்லதில்லை.

‘தினமும் 8 மணி நேரம் தொழிலாளர்கள் உழைக்கும் நிறுவனங்களில்தான் உற்பத்தித் திறனும் லாபமும் அதிகரிக்கின்றன' என்பது 19-ம் நூற்றாண்டிலேயே ஆய்வு செய்து கண்டறியப்பட்ட உண்மை. அதிக நேரம் வேலை பார்த்தால் உடல்நலக் கேடுகளும் வரக்கூடும். தினமும் 11 மணி நேரத்துக்கு மேல் நீண்ட நாள்கள் வேலை பார்ப்பவர்களுக்கு இதயநோய்கள் வரும் ஆபத்து 67% அதிகரிப்பதாக மருத்துவ ஆய்வுகள் கூறுகின்றன. தூக்கம் பறிபோவது, மன அழுத்தம், நினைவாற்றல் குறைபாடு, குடிக்கு அடிமையாவது, தாறுமாறான உணவுப்பழக்கத்தால் சர்க்கரை நோய் வருவது என்று அதிகரிக்கும் வேலை நேரத்தால் பிரச்னைகள் நிறைய!